Sheikh Indha Cade Oo Ku Tilmaamay madax Al-Shabaab Nin Aan Diinta Waxba Ka Garaneyn

Muqidsho: Sheekh Yuusuf Indha Cadde oo xalay meel fagaare ah laga sheegay inuu yahay Wasiiru Dowlaha Wasaarada Gaashaandhiga kadib markii maalmihii u dambeeyay ay isa soo tarayaan in xil ay u magacowday Dowladda KMG ayaa xalay si ba'an u weeraray Xarakada Alshabaab iyo Hogaamiyahooda qarsoon.

Indha Cadde ayaa sheegay inuu isagu ka mid ahaa aas aasayaashii Alshabaab, hase yeeshee wuxuu cadeeyay inay ka leexdeen waxyaabo badan oo ay noqdeen urur gaar ah, isagoona ku eedeeyay inay jeebkooda kaliya ku jirto islaanimada iyo gaaleysiinta, iyagoo aan heysan aayad ama xadiis.

Waxaa uu sheegay in Xarakada Alshabaab ay yihiin kuwo fulinaya amaro iyo xukuno ka soo baxaya Pakistan, wuxuuna tilmaamay inay caqabad ku yihiin nabada dalka Soomaaliya, ayna doonayaan inuu dalka Soomaaliya uusan weligiis yeelan nidaam iyo kala dambeyn oo dadkii ay rabaan ay dilaan oo ay gaalaysiiyaan, dadkay rabaana ay xukun aan loo dhamayn ku fuliyaan.

"Aniga iyo ninka Madaxda u ah Alshabaab Axmed Godane waa is garaneynaa ma ahan nin Culumo oo diinta yaqaan kamana yeeleyno inuu qori caaradii wax nagu xukumo oo nagu gaaleysiiyo"ayuu yiri Sheekh Yuusuf Indha Cadde oo banaanka soo dhigay wajiga rasmi ee Xarakada Alshabaab iyo ninka Amiirka u ah.

Sheekh Yuusuf Indha Cadde ayaa sidoo kale wax laga xumaado ku tilmaamay hadal uu dhowaan jeediyay Usama Bin Laden kaasoo ahaa in xukunka laga tuuro Dowladda Madaxweyne Shariif, isagoona cadeeyay in Usama laga doonayo inuu hadalkaas ka towbad keeno oo uu amray in la laayo dad islaam ah.

Waxaa uu sheegay in Kooxda Alshabaab ay tahay koox kaliya ka go'an dagaal oo aanay dooneyn wada hadal isagoona sheegay in ay iyaguna ka yeeleyn waxa uu ugu yeeray xoog iyo qori caaradii.

"Nimankaan la baxay Alshabaab Dowladda gogol ayay u fidisay waxaa laga dalbaday in waxa qaldan la isla saxo haddii tahay dhinacooda iyo dhinaca Dowladda, way diideen oo ay ka doorteen dagaal, marka ma suurto galaysaa qori afkiisa ayaan kugu gaalaynayaa, kugu musliminayaa, annaga Islaam ayaan nahay, Islaanimada waxaan uga dayanaynaa Rasuulka (CSW) ma ahan inaan uga dayano ninka sheegta Amiirka Alshabaab ee Axmed Godane"ayuu mar kale ku celiyay Gen. Cadde oo ugu baaqay shacabka in la difaaco Dowladda.

Hadalka Indha Cadde oo ahaa kii u horeeyay oo si toos ah ugu waajaho Alshabaab iyo saraakiishooda tan iyo markii uu Dowladda si rasmi ugu soo biiray, waxaana ilaa iyo hada jirin jawaab ka soo baxay Xarakada Alshabaab oo ku aadan eedeynta Indha Caddea

© 2009 WaryaTV Sweden. All rights reserved. This material may not be published, broadcast, rewritten or redistributed.

Leave your comments below (you can use your Facebook account, click the "from" field)