Guddoomiyaha Guurtida Oo Sheegay Inay 48 Sacadood Gudahood Ku Xallin Doonaan Khilaafka Guurtida Hadheeyey

 Hargeysa (Waryatv.com)-Guddoomiyaha Golaha Guurtida Somaliland Md Saleebaan Maxamuud Aadan ayaa sheegay inay 48 sacadood gudahood ay ku dhammayn doonaan khilaafka Golaha, kaas oo uu sheegay inay daba dheeraaday, isla markaana uu kala qaybiyey Mudanayaashii Golaha.

Fadhigii maanta ee Golaha Guurtida oo ay u dhammaayeen Shirguddoonka Golahaasi ayaa waxay Mudanayaasha ka balan qaadeen inay soo darsi doonaan xudunta khilaafka dheeraaday, kaas oo ay  sheegeen inay maalinta Arbacada Golaha horkeeni doonaan waxa ay Shirguddoon ahaan u arkaan xal, hase yeeshee Guddoomiyaha Golahaasi Guurtida oo hadal kooban u jeediyey Xildhibaanada ayaa waxa yidhi:-

“Wixii dhibaatooyin ah ee dhex yaalay Golaha waxaad moodaa in Goluhu Anaga (Shirgudoonka) nagu soo riixay waxaan ka odhanayaa mar haddii aad leedihiin idinkiiba is hayee xal noo keena waxaan ka idhaahdaa ma jiraan. Haddii aanu eedaysaneyaal noqonay waa inaanu anagu xalkii keenaa.

Mudadaba Arrintani way jiitameysay kolay shan todobaad way tahay sadex aan joogay iyo laba aan maqnaaba, waxaan leeyahay wixii aanu xal u aragno waxaanu isla qaadanay inaanu idin hor keeno.

Taayada (Shirgudoonka) ta golaha ayaa ka weyn in kasta oo aad iska soo dudeen haddana Goluhu waa qeybsan yahay markaa waxaan odhan lahaa ducaysanay oo wax wada cunay kuna faataxasanay.” Isagoo hadalkiisa sii wata waxa uu Guddoomiyuhu yidhi

“Xeerka xakamaynta hubka fudud waanagii sabtidii idiin qeybinay sidii caadadu ahaan jirtay xeerka maanta laga bilaabo 48 saacadood ku soo darsa. Anaguna 48 kaasi saacadood arrinta khilaafka waa inaanu ka keenaa wixii xal ah Isniinta iyo Salaasada waynu kala maqnaanaynaa oo Arbacada ayaynu isku imanaynaa. Goluhuna hawshiisa ha wato Anaguna Shirgudoonka waa inaanu wixii aad na farteen aanu galnaa oo keenaa.”

Xildhibaan Maxamed Maxamuud Yaasiin (Dheeg) oo hadalkaasi Guddoomiyaha kadib Golaha kaga dhawaaqay inay soo badali doonaan hadii aanay Shirguddoonku khilaafka u dhexeeya xal u helin.

“Waxaanu ku cel celinay waar khilaaf kale nama hayo  sadexdiinaasi haddii aad  soo midowdaan goluhuna wuu midoobayaa. ilmaadeerayaaloow haddii aydaan midoobayn waxaad na tidhaahdaan sadex kale keena.”

Xafiiska wararka ee Waryatv

Hargeysa-Somaliland

Reported Cabdiqani Cabdilaahi Axmed

Asporo4live@hotmail.com

© 2009 WaryaTV Sweden. All rights reserved. This material may not be published, broadcast, rewritten or redistributed.